उच्च कारोबारसहित नेप्सेमा दमदार उछाल, ग्रीन मारुबोजु क्यान्डलको निर्माण

NEPSE सूचकाङ्कले सशक्त बुलिश गति देखाउँदै ४७ अंकको वृद्धि सहित हरियो बन्द भयो। सूचकाङ्कले स्पष्ट ग्रीन मारुबोजु क्यान्डल निर्माण गरेको छ, जसले दिनभरि निरन्तर खरिद चाप रहेको र माथिल्लो स्तरमा बिक्री दबाब न्यून रहेको संकेत गर्छ। आजको कुल कारोबार रकम ५.५ अर्ब रुपैयाँभन्दा माथि पुगेको छ, जसले बजारमा लगानीकर्ता तथा कारोबारीहरूको सक्रिय सहभागिता देखाउँछ।

कारोबारको सुरुवातदेखि नै बजारको मनोविज्ञान सकारात्मक देखियो। सक्रिय खरिदका कारण सूचकाङ्कले क्रमशः हायर–हाई र हायर–लो संरचना बनाउँदै अघि बढ्यो। यो मूल्य चालले हालैको सतर्क र साइडवेज प्रवृत्तिपछि छोटो अवधिको गति बलियो बन्दै गएको संकेत गर्दछ।

यस वृद्धिलाई कारोबार रकमले समेत राम्रोसँग समर्थन गरेको देखिन्छ, जुन प्राविधिक दृष्टिकोणबाट महत्वपूर्ण पुष्टि हो। पछिल्ला केही सत्रहरूमा देखिएको कमजोर भोल्युमको समस्या आज सुधारिएको छ। स्वस्थ कारोबार रकमले यो वृद्धि  वास्तविक  (Accumulation) भएको पुष्टि गर्दछ। बैंकिङ, जलविद्युत् र बीमा क्षेत्रका सेयरहरूले बजार वृद्धिमा उल्लेखनीय योगदान दिएका छन्, जसले बजारको समग्र मजबुतीलाई झल्काउँछ।

लगानीकर्ता मनोविज्ञानमा हालैका राजनीतिक घटनाक्रमहरूले पनि सकारात्मक प्रभाव पारेका छन्।  बालेन रास्वपा (राष्ट्रिय स्वतन्त्र पार्टी) मा आबद्ध भएको समाचारले विद्यमान राजनीतिक अनिश्चितता केही हदसम्म कम गरेको देखिन्छ, जसका कारण बजारमा नयाँ सहभागिता बढेको हो।

प्राविधिक रूपमा हेर्दा, ग्रीन मारुबोजु क्यान्डलको निर्माणले निकट अवधिमा बुलिश धारणा थप बलियो बनाएको छ। आगामी सत्रहरूमा सूचकाङ्कले महत्वपूर्ण मनोवैज्ञानिक तथा प्राविधिक स्तरहरू माथि स्थायित्व कायम राख्दै कारोबार रकम निरन्तर रूपमा उच्च रहन सकेमा, बजारले माथिल्लो प्रतिरोध स्तरतर्फ यात्रा गर्ने सम्भावना देखिन्छ। यद्यपि, उच्च स्तरमा नाफा बुकिङको सम्भावना रहन सक्ने भएकाले लगानीकर्ताहरूले सतर्कता अपनाउनु उपयुक्त हुनेछ।