लगानीकर्ताहरु चीनतिर फर्किएपछि दक्षिण पूर्वी एसियाका सेयर बजार अस्तव्यस्त

काठमाडौं: विश्वव्यापी लगानीकर्ताहरूले दक्षिण पूर्वी एसियाबाट लगानी फिर्ता लैजान थालेपछि यस क्षेत्रका सेयर बजार अस्तव्यस्त बन्न थालेका छन्। विशेष गरी, ठूला अर्थतन्त्रहरूप्रति बढ्दो चिन्ता र लगानीकर्ताहरूको चिनियाँ इक्विटीतर्फको आकर्षणका कारण दक्षिण पूर्वी एसियामा विदेशी पूँजीको बहिर्गमन तीव्र भएको छ।

इन्डोनेसिया र थाइल्यान्ड, यस क्षेत्रका दुई ठूला अर्थतन्त्र, सन् २०२५ मा सबैभन्दा कमजोर प्रदर्शन गर्ने बजारहरूमध्ये पर्ने अनुमान गरिएको छ। गत साता मात्र, इन्डोनेसियाली सेयर बजार पछिल्लो चार वर्षयताको न्यूनतम विन्दुमा पुगेको थियो, भने इन्डोनेसियाली रुपिया पाँच वर्षयताको सबैभन्दा कमजोर स्तरमा कारोबार भइरहेको छ। जकार्ता कम्पोजिट स्टक बेन्चमार्क शुक्रबार मात्र १.२ प्रतिशतले घट्यो।

अमेरिकी डलरको हिसाबले, सन् २०२५ को प्रारम्भदेखि एमएससीआई इन्डोनेसिया सूचकांक १६ प्रतिशतले घटेको छ, जबकि एमएससीआई थाइल्यान्ड १२ प्रतिशतले घटेको छ। यी बजारहरूमा आर्थिक अस्थिरता र विक्री चाप अझ तीव्र बनेको छ, जसमा अमेरिकी राष्ट्रपति डोनाल्ड ट्रम्पद्वारा सुरु गरिएको व्यापार युद्ध र क्षेत्रीय कोष प्रबन्धकहरूद्वारा चीनतर्फ लगानी सारिनु मुख्य कारक बनेका छन्।

इन्स्टिच्युट अफ इन्टरनेसनल फाइनान्सका तथ्यांकअनुसार, यस वर्ष इन्डोनेसियाली बजारबाट १.३ अर्ब डलर र थाई इक्विटीबाट ५० करोड डलर विदेशी लगानी फिर्ता गरिएको छ, जबकि सोही अवधिमा चिनियाँ इक्विटीमा १३ अर्ब डलरको लगानी प्रवाह भएको छ।

यसका साथै, चिनियाँ स्टार्टअप डीपसिकको आर्टिफिसियल इन्टेलिजेन्समा प्रगति र प्रविधि क्षेत्रमा बढ्दो लगानीका कारण चिनियाँ इक्विटी विश्वव्यापी रूपमा उत्कृष्ट प्रदर्शन गर्ने सम्पत्तिहरूमा परेका छन्। सन् २०२५ को प्रारम्भदेखि हङकङको ह्याङ सेङ सूचकांक २० प्रतिशतभन्दा बढीले वृद्धि भएको छ।