Hong Kong Stock Exchange : २०२५ मा विश्वकै ठूलो आईपीओ फन्डरेजिङ केन्द्र

Hong Kong ले सन् २०२५ मा विश्वको सबैभन्दा ठूलो प्रारम्भिक सार्वजनिक निष्कासन (आईपीओ) फन्डरेजिङ स्थलको रूपमा आफ्नो स्थान कायम राखेको छ। हङकङ स्टक एक्सचेन्जको तथ्यांकअनुसार यस वर्ष ११९ वटा कम्पनीहरूको आईपीओमार्फत कुल ३७.४ अर्ब अमेरिकी डलर (करिब २९२ अर्ब हङकङ डलर) संकलन गरिएको छ। यसमा विश्वका पाँच ठूला आईपीओमध्ये दुईवटा पनि समावेश रहेका छन्।

उद्योगगत आधारमा हङकङ स्वास्थ्य सेवा तथा बायोटेक, प्रविधि, मिडिया तथा दूरसञ्चार, औद्योगिक तथा नयाँ ऊर्जा क्षेत्रमा विश्वका प्रमुख वित्तीय केन्द्रहरूमध्ये एक बनेको छ।

हङकङ विशेष प्रशासनिक क्षेत्र सरकारका वित्तीय सचिव Paul Chan ले सन् २०२५ लाई ‘सर्प वर्ष’ का रूपमा अत्यन्त सफल भएको बताएका छन्। उनका अनुसार बजारमा तरलता उल्लेखनीय रूपमा सुधार भएको छ भने पूँजीका स्रोतहरू पनि निकै विविधीकृत भएका छन्।

यस अवधिमा Hang Seng Index झण्डै ६ हजार ५ सय अंकले वृद्धि भएको छ, जुन एक वर्षअघिको तुलनामा ३२ प्रतिशतले बढी हो। अंक र प्रतिशत दुवै हिसाबले यो सर्प वर्षको इतिहासमै उत्कृष्ट प्रदर्शन रहेको बताइएको छ।

वित्तीय सचिव चानले आगामी वर्ष (घोडा वर्ष) प्रति सतर्क आशावादी रहेको बताएका छन्। सन् २०२६ को सुरुवातमै २४ वटा नयाँ सूचीकरण भइसकेको र ४८८ कम्पनीहरू सूचीकरणको प्रतीक्षामा रहेको जानकारी दिइएको छ।

यस उपलब्धिले हङकङलाई अन्तर्राष्ट्रिय वित्तीय केन्द्रको रूपमा अझ मजबुत बनाएको छ, जसले नवीन कम्पनीहरू र विश्वभरका लगानीकर्ताहरूलाई आकर्षित गरिरहेको छ।